Albisteak

 

1997az geroztik, Lurralde Antolamenduaren Gidalerroen bitartez, Euskadik ordena orekatua sustatu du hiri-eremuaren eta landa-eremuaren, jarduera ekonomikoen, azpiegituren edota naturaguneen artean. Euskadi, Estatuarekin alderatuta, lurralderik orekatuenetakoa izatea lortu dugu; biztanle-dentsitate altua izan arren, bere azaleraren laurden bat babestuta dago bere ingurumen-balioagatik eta, aldi berean, etxebizitza hutsen proportzio txikiena du.

Baina egoera berri eta aldakorretara egokitu behar dugu, gure esku dago 20 urte barru izan nahiko genukeen lurraldea irudikatzea. Hori dela eta, Eusko Jaurlaritzan, LAGak (Lurralde Antolamenduaren Gidalerroak) berrikusteko prozesua martxan jarri dugu eta abiapuntu gisa honako gaiak proposatu ditugu; paisaia, medio fisiko eta azpiegitura berdea, landa-eremua, hiri-eremua, mugikortasun jasangarria, ura, energia eta gobernantza.

Berraztertze-lana gauzatzeko gizarte osoaren parte hartzea bultzatu nahi dugu eta horretarako hainbat parte-hartze bide ireki ditugu.

Parte hartzeko aukera egongo da euskal lurraldean zehar egingo diren 16 tailer parte hartzaileetan. Bilbo metropoli-barrutia eremu funtzionaleko tailerra datorren larunbatean, ekainak 18, goizeko 10.30etan izango da, Bilbon. Aukera paregabea izango da gure lurraldeari buruz eta honako gai garrantzitsuei buruz eztabaidatzeko; paisaia, azpiegiturak, hiri-eremu eta landa-eremua, ura, energia...

Saio horretan parte hartzeko beharrekoa da, ekainaren 8a baino lehen, izena ematea. Izan ere, parte hartzaile kopuruaren arabera zehaztuko da saioaren kokapena. Izena emateko moduak:

  • https://goo.gl/ivDSXj estekan dagoen inprimakia betez
  • 605 715 240 zenbakira deituz edo whatsapp bat bidaliz (Izen-abizenak, udalerria adieraziz)

Tailer presentzialetara bertaratu ezin daitezkeenek Irekia webgunean parte hartu ahal izango dute. Gunean argitaratu da LAGak berrikusteko oinarrizko dokumentua (dokumentu exekutiboa), testuari ekarpenak egiteko. Gainera, gai bakoitzean hasitako eztabaidetan eta inkestetan online parte hartzeko aukera dago. http://www.irekia.euskadi.eus/eu/debates/1056?stage=discussion

Sare sozialetan ere parte hartu ahal izango da; Twitter-en, #LAG_Euskadi traola, eta Facebook-en, Lurraldea profilean.

LAGak berrikusteko prozesuak 3 urte inguru iraungo ditu. Informazio eta aurrerapen guztiak webgunean eguneratuko dira: http://www.euskadi.eus/lag-berrikuspena

Pentsa dezagun gure lurraldaren etorkizunean. Parte hartu Lurralde Estrategian!

Kartela (PDF 274KB)

Esku-orria (PDF 347KB)